Back to Home
ഒക്ടോബര്‍ വിസ ബുള്ളറ്റിന്‍: പ്രധാന മാറ്റങ്ങള്‍ അതീവ നിര്‍ണ്ണായകം
- പി.പി ചെറിയാന്‍
വാഷിംഗ്ടണ്‍ ഡിസി: കുടുംബ തൊഴില്‍ അടിസ്ഥാനമാക്കിയുള്ള ഗ്രീന്‍ കാര്‍ഡ് അപേക്ഷകരെ സംബന്ധിച്ച് ഒക്ടോബര്‍ മാസത്തെ വിസ ബുള്ളറ്റിന്‍ അതീവ നിര്‍ണ്ണായകമാണ്. പുതിയ സാമ്പത്തിക വര്‍ഷം ഒക്ടോബര്‍ 1ന് ആരംഭിക്കുന്നതിനാല്‍, വാര്‍ഷിക കുടിയേറ്റ വിസകളുടെ എണ്ണം ഈ മാസത്തില്‍ പുനക്രമീകരിക്കപ്പെടുന്നു.
കഴിഞ്ഞ സാമ്പത്തിക വര്‍ഷത്തില്‍ പരിധികള്‍ കവിഞ്ഞതിനാല്‍ സെപ്റ്റംബറില്‍ തടസ്സപ്പെട്ടിരുന്ന ഇന്ത്യക്കാരുടെ ഇ.ബി-2, ഇ.ബി-5 ഉള്‍പ്പെടെയുള്ള പല വിഭാഗങ്ങളും ഒക്ടോബറില്‍ വീണ്ടും തുറന്നു.
തൊഴില്‍ വിഭാഗത്തില്‍ ചൈനയുടെ ഫയലിംഗ് തീയതികളില്‍ വലിയ പുരോഗതിയുണ്ടായിട്ടുണ്ട്. ഉദാഹരണത്തിന്, ചൈനയുടെ ഇ.ബി-3 പ്രൊഫഷണല്‍ വിഭാഗം 2024 ഏപ്രില്‍ 1 വരെ മുന്നോട്ട് നീങ്ങി.
പല രാജ്യങ്ങള്‍ക്കുമുള്ള ഇ.ബി-2, ഇ.ബി-3 ഫൈനല്‍ ആക്ഷന്‍ തീയതികള്‍ പിന്നോട്ട് പോയിട്ടുണ്ട്. ഇത് അന്തിമ അനുമതിക്കായി കാത്തിരിക്കുന്നവരുടെ നടപടികള്‍ വൈകിപ്പിച്ചേക്കാം.
സ്ഥിര താമസക്കാരുടെ പങ്കാളികള്‍ക്കും മക്കള്‍ക്കുമുള്ള എഫ്2എ വിഭാഗത്തില്‍ അനുകൂലമായ മാറ്റങ്ങളുണ്ടായിട്ടുണ്ട്.
അപേക്ഷകര്‍ തങ്ങളുടെ പ്രയോറിറ്റി തീയതിയും അതത് രാജ്യത്തിന്‍റെയും വിഭാഗത്തിന്‍റെയും കട്ട്ഓഫ് തീയതിയും താരതമ്യം ചെയ്ത് നോക്കേണ്ടതാണ്. പ്രയോറിറ്റി തീയതി പ്രസിദ്ധീകരിച്ച തീയതിയേക്കാള്‍ മുമ്പുള്ളതായിരിക്കണം.
യുഎസിനുള്ളില്‍ നിന്ന് അപേക്ഷിക്കുന്നവര്‍ ഫോം 1-485 സമര്‍പ്പിക്കുന്നതിന് മുമ്പ് യു.എസ്.സിറ്റിസണ്‍ഷിപ്പ് ആന്‍ഡ് ഇമ്മിഗ്രേഷന്‍ സര്‍വീസസിന്‍റെ ഒക്ടോബര്‍ മാസത്തെ നിര്‍ദ്ദേശങ്ങള്‍ കര്‍ശനമായി പാലിക്കണം. ഡേറ്റ് ആന്‍റ് ഫയലിംഗ് പ്രകാരം അപേക്ഷിക്കാന്‍ കഴിയുന്നത് ഗ്രീന്‍ കാര്‍ഡ് ഉടന്‍ ലഭിക്കുമെന്ന് അര്‍ത്ഥമാക്കുന്നില്ല.
ഒക്ടോബറിലെ മാറ്റങ്ങള്‍ പ്രത്യേകിച്ച് ഇന്ത്യന്‍ ഇ.ബി-2, ഇ.ബി-5, ഇ.ബി-1 അപേക്ഷകര്‍ക്ക് ശ്രദ്ധേയമാണ്. അതേസമയം, ചില വിഭാഗങ്ങളിലെ തീയതികള്‍ പിന്നോട്ടുപോയത് വിസാ ലഭ്യത കര്‍ശനമായി നിയന്ത്രിക്കപ്പെടുന്നതിന്‍റെ സൂചനയാണ്. പുതിയ ഡിമാന്‍ഡ് കണക്കുകള്‍ ലഭിക്കുന്നതനുസരിച്ച് വരും മാസങ്ങളില്‍ കട്ട്ഓഫ് തീയതികളില്‍ വീണ്ടും മാറ്റങ്ങള്‍ വരാന്‍ സാധ്യതയുണ്ട്.
