Back to Home
ട്രംപിന് തിരിച്ചടി; പലസ്തീനെ അംഗീകരിക്കണമെന്ന് ഭൂരിപക്ഷം അമേരിക്കക്കാരും
വാഷിങ്ടണ്‍: പലസ്തീനെ രാഷ്ട്രമായി അംഗീകരിക്കേണ്ടതില്ലെന്ന യുഎസ് പ്രസിഡന്‍റ് ഡൊണാള്‍ഡ് ട്രംപിന്‍റെ നിലപാടിന് വിരുദ്ധമാണ് അമേരിക്കന്‍ പൊതുജനാഭിപ്രായമെന്ന് റോയിട്ടേഴ്സ്, ഇപ്സോസ് പോള്‍ റിപ്പോര്‍ട്ട്. മിഡില്‍ ഈസ്റ്റില്‍ ദ്വിരാഷ്ട്ര പരിഹാരം ഉണ്ടാകാനായി, പലസ്തീന്‍ രാഷ്ട്രത്തെ അമേരിക്ക അംഗീകരിക്കുന്നതിനെ 59% അമേരിക്കക്കാരും പിന്തുണയ്ക്കുന്നു.
ട്രംപിന്‍റെ റിപ്പബ്ലിക്കന്‍ പാര്‍ട്ടിയില്‍ പോലും 41% പേര്‍ ഈ നിലപാടിന് അനുകൂലമാണ്. 2023 ഒക്ടോബറിലെ ആക്രമണത്തിന് ശേഷം ഗാസയില്‍ ഇസ്രയേല്‍ നടത്തുന്ന സൈനിക നടപടി അതിരുകടന്നതാണെന്ന് 60% പേര്‍ അഭിപ്രായപ്പെട്ടു. ഇത് ട്രംപിന്‍റെ ഇസ്രയേല്‍ അനുകൂല നിലപാടില്‍ നിന്ന് വ്യത്യസ്തമാണ്.
ഈ മാസം ഇസ്രയേല്‍ ഹമാസ് വെടിനിര്‍ത്തലിന് മധ്യസ്ഥത വഹിച്ച ട്രംപിന്‍റെ നടപടിയെ 51% പേര്‍ അംഗീകരിച്ചു. വെടിനിര്‍ത്തലിന് തൊട്ടുമുമ്പ് 33% ആയിരുന്ന ട്രംപിന്‍റെ വിദേശനയ പിന്തുണ പുതിയ പോള്‍ ഫലത്തില്‍ 38% ആയി ഉയര്‍ന്നിട്ടുണ്ട്. രാജ്യവ്യാപകമായി 4,385 പേരില്‍ നടത്തിയ ഓണ്‍ലൈന്‍ പോളിലാണ് കണ്ടെത്തല്‍.
