Times of American Malayali
Back to Home
ഓരോ മണിക്കൂര്‍ ഇടവേളയിലും ഓരോ സ്റ്റാര്‍ഷിപ്പ് റോക്കറ്റ് വിക്ഷേപണം നടത്താന്‍ കഴിയുംവിധം മുന്നേറുക എന്നതാണ് സ്പേസ് എക്സിന്‍റെ ലക്ഷ്യമെന്ന് ഇലോണ്‍ മസ്ക്. സ്റ്റാര്‍ഷിപ്പിനെ അതിവേഗം പുനരുപയോഗിക്കാവുന്ന ഒരു വിക്ഷേപണ സംവിധാനമാക്കി മാറ്റുക എന്നതാണ് സ്പേസ്എക്സിന്‍റെ ദീര്‍ഘകാല ലക്ഷ്യം.
ഭാവിയില്‍ മണിക്കൂറില്‍ ഒന്ന് എന്ന നിലയില്‍ റോക്കറ്റ് വിക്ഷേപണം നടത്താന്‍ കഴിഞ്ഞേക്കുമെന്ന് അദ്ദേഹം എക്സ് പോസ്റ്റില്‍ അവകാശപ്പെട്ടു. ചരിത്രം കുറിച്ച സ്റ്റാര്‍ഷിപ്പ് ഫ്ളൈറ്റ് 14ന് തൊട്ടുമുമ്പാണ് അദ്ദേഹം ഈ അവകാശവാദം ഉന്നയിച്ചത്. മണിക്കൂറിലൊരിക്കല്‍ വിക്ഷേപണങ്ങള്‍ സാധ്യമാകാന്‍ സ്റ്റാര്‍ഷിപ്പിന് രണ്ട് മുതല്‍ മൂന്ന് വര്‍ഷം വരെ സമയം വേണ്ടിവരുമെന്നും അദ്ദേഹം പറയുന്നു.
ഇലോണ്‍ മസ്കിന്‍റെ സ്പെയ്സ് എക്സ് വികസിപ്പിച്ച ലോകത്തെ ഏറ്റവും വലുതും കരുത്തുറ്റതുമായ റോക്കറ്റ് സ്റ്റാര്‍ഷിപ്പ്چആദ്യമായി ഭ്രമണപഥത്തിലെത്തി.
ഇന്ത്യന്‍ സമയം തിങ്കളാഴ്ച വൈകിട്ട് 6.20ന് ടെക്സസിലെ സ്റ്റാര്‍ബേസില്‍നിന്നായിരുന്നു വിക്ഷേപണം. കുതിച്ചുയര്‍ന്ന് രണ്ടരമിനിറ്റില്‍ സ്റ്റാര്‍ഷിപ്പില്‍നിന്ന് വേര്‍പെട്ട ആദ്യഘട്ട സൂപ്പര്‍ ഹെവി ബൂസ്റ്റര്‍ ഏഴാം മിനിറ്റില്‍ മെക്സിക്കന്‍ ഉള്‍ക്കടലില്‍ പതിച്ചു. ഈ ദൗത്യത്തില്‍ ഹെവി ബൂസ്റ്റര്‍ ഘട്ടത്തെ സുരക്ഷിതമായി വീണ്ടെടുക്കാന്‍ സ്പെയ്സ് എക്സിന് പദ്ധതിയുണ്ടായിരുന്നില്ല.
തുടര്‍ന്ന് രണ്ടാംഘട്ടമായ സ്റ്റാര്‍ഷിപ്പ് പേടകം ഭൂമിയുടെ 275 കിലോമീറ്റര്‍ ഉയരത്തിലുള്ള ഭ്രമണപഥം ലക്ഷ്യമാക്കി യാത്രതിരിച്ചു. മണിക്കൂറില്‍ 28,000 കിലോമീറ്റര്‍ വേഗത്തിലായിരുന്നു സഞ്ചാരം. 10 മണിക്കൂര്‍ നീളുന്ന പരീക്ഷണദൗത്യത്തില്‍ ആറുതവണ ഭൂമിയെ ചുറ്റാനാണ് ലക്ഷ്യമിട്ടിരുന്നതെങ്കിലും സ്പെയ്സ്എക്സ് ആ പദ്ധതി ഉപേക്ഷിച്ചു. ആറുഭ്രമണമെന്നത് മൂന്നാക്കി കുറച്ചു. മൂന്ന് മണിക്കൂറോളം ഭ്രമണപഥത്തില്‍ സഞ്ചരിച്ചശേഷം പേടകം ചിലിക്കു പടിഞ്ഞാറ് ശാന്തസമുദ്രത്തില്‍ പതിച്ചു. ദൗത്യത്തിന്‍റെ ഭാഗമായി സ്പെയ്സ് എക്സിന്‍റെ 26 പുതുതലമുറ സ്റ്റാര്‍ലിങ്ക് വി 3 ഉപഗ്രഹങ്ങളും സ്റ്റാര്‍ഷിപ്പ് ഭ്രമണപഥത്തിലെത്തിച്ചു.
സ്റ്റാര്‍ഷിപ്പിനെ ആദ്യമായി ഭൂമിയുടെ ഭ്രമണപഥത്തിലെത്തിച്ചതിലൂടെ, ബഹിരാകാശസഞ്ചാരികളെ ചൊവ്വയില്‍ ഇറക്കാനുള്ള നാസയുടെ ആര്‍ടെമിസ് ദൗത്യത്തിന് സജ്ജമാണെന്ന് തെളിയിക്കാന്‍ സ്പെയ്സ് എക്സിന് കഴിഞ്ഞു. ആര്‍ടെമിസ് 3 ദൗത്യത്തില്‍ സ്റ്റാര്‍ഷിപ്പും ജെഫ് ബെസോസിന്‍റെ ബഹിരാകാശ കമ്പനിയായ ബ്ലൂ ഒറിജിന്‍ വികസിപ്പിക്കുന്ന ലൂണാര്‍ പേടകവും പങ്കാളികളാകും. തുടര്‍ന്ന് 2028ല്‍ നടക്കുന്ന ആര്‍ടെമിസ് 4 ദൗത്യത്തില്‍ ചന്ദ്രനില്‍ എത്തിച്ചേരാന്‍ ആയിരിക്കും ലക്ഷ്യമിടുന്നത്. അത് സാധ്യമാക്കുകയും ബഹിരാകാശ സഞ്ചാരികളെ എത്തിക്കുകയും ചെയ്യും.
