Times of American Malayali
Back to Home
ന്യൂഡല്ഹി: പശ്ചിമേഷ്യന് പ്രതിസന്ധിയെത്തുടര്ന്ന് ഹോര്മുസ് കടലിടുക്ക് നിശ്ചലമായിരിക്കെ, തടസങ്ങള് ഭേദിച്ച് ഇന്ത്യന് എല്പിജി ടാങ്കര് സര്വ് ശക്തി ലക്ഷ്യസ്ഥാനത്തേക്ക്.
ഇറാനും യുഎസും തമ്മിലുള്ള സംഘര്ഷം മൂലം കപ്പല് ഗതാഗതം ഏതാണ്ട് പൂര്ണമായി നിലച്ച പാതയിലൂടെയാണ് 45,000 ടണ് പാചകവാതകവുമായി ഈ സൂപ്പര്ടാങ്കര് സഞ്ചരിക്കുന്നത്. അമേരിക്ക ഇറാനുമേല് ഉപരോധം ശക്തമാക്കിയതോടെ ഹോര്മുസ് കടലിടുക്കിലൂടെയുള്ള കപ്പല് നീക്കം നിലച്ചിരുന്നു. ഈ പ്രതിസന്ധി ഘട്ടത്തിന് ശേഷം ഹോര്മുസ് കടലിടുക്ക് വിജയകരമായി മുറിച്ചുകടക്കുന്ന ആദ്യ ഇന്ത്യന് കപ്പലായി സര്വ് ശക്തിچമാറും.
സംഘര്ഷത്തിനിടയിലും ഇറാനുമായുള്ള നേരിട്ടുള്ള ചര്ച്ചകളിലൂടെ എട്ട് എല്പിജി കപ്പലുകള് കടത്തിവിടാന് ഇന്ത്യയ്ക്ക് സാധിച്ചിരുന്നു. ഫെബ്രുവരിയില് പേര്ഷ്യന് ഗള്ഫില് പ്രവേശിച്ച സര്വ് ശക്തി, ദുബായ്ക്ക് സമീപം വച്ച് മറ്റൊരു കപ്പലില് നിന്നാണ് വാതകം ശേഖരിച്ചത്. പൊതുമേഖലാ സ്ഥാപനമായ ഇന്ത്യന് ഓയില് കോര്പറേഷനാണ് ഈ ഇന്ധനത്തിന്റെ ഗുണഭോക്താവ് എന്നാണ് റിപ്പോര്ട്ടുകള്. പത്ത് മുതല് പതിനാലു മണിക്കൂര് വരെ സമയമെടുക്കുന്ന അതീവ സങ്കീര്ണമായ യാത്രയാണിത്. സുപ്രധാന നീക്കം രാജ്യത്തെ പാചകവാതക വിതരണത്തില് വലിയ ആശ്വാസം നല്കുമെന്നാണ് വിലയിരുത്തപ്പെടുന്നത്.
ലോകത്തിലെ മൂന്നാമത്തെ വലിയ എണ്ണ ഇറക്കുമതി രാജ്യവും രണ്ടാമത്തെ വലിയ എല്പിജി ഉപഭോക്താവുമാണ് ഇന്ത്യ. യുദ്ധം വിതരണ ശൃംഖലയെ ബാധിക്കാതിരിക്കാന് കേന്ദ്രസര്ക്കാര് കടുത്ത ജാഗ്രതയിലാണ്. എല്പിജി ഉല്പാദനം 60 ശതമാനം വര്ധിപ്പിച്ച് പ്രതിദിനം 54,000 ടണ്ണാക്കി മാറ്റിയിരുന്നു. എല്പിജി ടാങ്കറുകള്ക്ക് തുറമുഖങ്ങളില് മുന്ഗണന നല്കാന് നിര്ദേശം നല്കിയിട്ടുണ്ട്.
