Times of American Malayali
Back to Home
ഡാളസ്: കാന്‍സര്‍ ബാധിതയായ ഭാര്യയുടെ ചികിത്സാച്ചെലവുകള്‍ക്കായി 81-ാം വയസ്സിലും ലഗേജ് ഡെലിവറി ജോലി ചെയ്യുന്ന ഡോണ്‍ ജോണ്‍സന്‍റെ കഥ ടെക്സസില്‍ ശ്രദ്ധ നേടി. വിമാനയാത്രയില്‍ നഷ്ടപ്പെട്ട ലഗേജ് വീട്ടിലെ പടികള്‍ കയറ്റി എത്തിക്കാന്‍ ഡോണ്‍ പ്രയാസപ്പെടുന്ന ദൃശ്യം എറിന്‍ ഹവലിന്‍റെ ഡോര്‍ ക്യാമറയില്‍ പതിഞ്ഞതോടെയാണ് അദ്ദേഹത്തിന്‍റെ സാഹചര്യം പുറത്തറിഞ്ഞത്.
ഭാര്യ ജോസഫിന്‍റെ ചികിത്സയ്ക്കും കുടുംബച്ചെലവുകള്‍ക്കും പണം കണ്ടെത്താനാണ് ഡോണ്‍ കഴിഞ്ഞ മൂന്ന് വര്‍ഷമായി ഈ ജോലി ചെയ്യുന്നത്. 57 വര്‍ഷമായി ഒരുമിച്ച് ജീവിക്കുന്ന ദമ്പതികളെ സഹായിക്കാന്‍ എറിന്‍ ഗോ ഫണ്ട് മീ ധനസമാഹരണം ആരംഭിച്ചു. സെപ്റ്റംബര്‍ 24ഓടെ കാമ്പെയ്നിലേക്ക് 2,81,000 ഡോളറിലധികം സംഭാവന ലഭിച്ചതായി പ്രാദേശിക മാധ്യമം റിപ്പോര്‍ട്ട് ചെയ്തിരുന്നു. പിന്തുണയ്ക്കും പ്രാര്‍ഥനകള്‍ക്കും ഡോണും ജോസഫും നന്ദി അറിയിച്ചു.
എന്നാല്‍ സെപ്റ്റംബര്‍ 25ന് ഗോ ഫണ്ട് കാമ്പെയ്ന്‍ നീക്കുകയും സംഭാവന നല്‍കിയവര്‍ക്ക് പണം തിരികെ നല്‍കുകയും ചെയ്തു. സേവന നിബന്ധനകളുടെ ലംഘനമാണ് കാരണമെന്ന് കമ്പനി അറിയിച്ചു. ലംഘനം എന്താണെന്ന് വ്യക്തമാക്കിയിട്ടില്ല.
