Times of American Malayali
Back to Home
ഡാലസ്: ലോകമെമ്പാടുമുള്ള പ്രവാസി മലയാളികള്‍ ആവേശത്തോടെ കാത്തിരുന്ന 27-ാമത് രാജ്യാന്തര 56 ചീട്ടുകളി മത്സരത്തിന് ഡാലസില്‍ വര്‍ണ്ണാഭമായ സമാപനം.
മൂന്ന് ദിവസങ്ങളിലായി ഡാലസ് ക്രൈസ്റ്റ് ദി കിംഗ് ക്നാനായ പള്ളി പാരീഷ് ഓഡിറ്റോറിയത്തില്‍ നടന്ന ആവേശകരമായ കലാശപ്പോരാട്ടത്തില്‍ കാനഡയില്‍ നിന്നുള്ള ടീം ചാമ്പ്യന്മാരായി.
റോബര്‍ട്ട് മാത്യു ക്യാപ്റ്റനായ കാനഡ ടീമിലെ ജെയിംസ് താന്നിക്കല്‍, ജോസഫ് ജോസഫ് എന്നിവരടങ്ങുന്ന സംഘമാണ് ഇത്തവണത്തെ വിജയികളായി ട്രോഫിയും 4500 ഡോളറിന്‍റെ ഒന്നാം സമ്മാനവും കരസ്ഥമാക്കിയത്. സമാപന സമ്മേളന വേദിയില്‍ വിജയികള്‍ക്ക് ട്രോഫിയും ക്യാഷ് അവാര്‍ഡുകളും സമ്മാനിച്ചു.
ജോയ് നെല്ലാമറ്റം ക്യാപ്റ്റനായ, മാത്യു ഗീവര്‍ഗീസ്, തോമസ് കടിയന്‍പള്ളില്‍ എന്നിവരുടെ ഷിക്കാഗോ ടീം രണ്ടാം സ്ഥാനവും 3000 ഡോളറും നേടി. സിറിയക് വള്ളിപ്പടവില്‍ നയിച്ച ലോസ് ആഞ്ചലസ് ടീം (കുര്യച്ചന്‍ മുല്ലപ്പള്ളി, വിന്‍സെന്‍റ് കൊട്ടിരിക്കല്‍) മൂന്നാം സ്ഥാനവും (2250 ഡോളര്‍), കുഞ്ഞുമോന്‍ ഇല്ലിക്കാട്ടില്‍ നയിച്ച ഹൂസ്റ്റണ്‍ ടീം (തോമസ് ഐക്കരേത്ത്, സാജി പള്ളിക്കിഴ ക്കേതില്‍) നാലാം സ്ഥാനവും (1500 ഡോളര്‍) സ്വന്തമാക്കി.
ടൂര്‍ണമെന്‍റിന്‍റെ ഭാഗമായി നടന്ന റേസ് ഫോര്‍ ഫണ്‍چമത്സരത്തില്‍ ആതിഥേയരായ ഡാലസ് ടീം ചാമ്പ്യന്മാരായി. ഷിബു ജെയിംസ് (ക്യാപ്റ്റന്‍), ജോസ് വര്‍ക്കി, ബിനോ കല്ലുങ്കല്‍ എന്നിവരടങ്ങുന്ന സംഘമാണ് ഒന്നാം സ്ഥാനം നേടിയത്. ഡിട്രോയിറ്റില്‍ നിന്നുള്ള ജോസ് എബ്രഹാം (ക്യാപ്റ്റന്‍), സുനില്‍ നൈനാന്‍, ജോസ് ഫിലിപ്പ് ടീം രണ്ടാം സ്ഥാനവും, ഷിക്കാഗോയില്‍ നിന്നുള്ള ജോസഫ് ആലപ്പാട്ട് (ക്യാപ്റ്റന്‍ ), ജോമോന്‍ തൊടുകയില്‍, കുര്യന്‍ നെല്ലാമറ്റം ടീം മൂന്നാം സ്ഥാനവും, ന്യൂയോര്‍ക്കില്‍ നിന്നുള്ള ടോം തോമസ് (ക്യാപ്റ്റന്‍), ഷാജി തോമസ്, ബിജു അപ്പന്‍ ടീം നാലാം സ്ഥാനവും കരസ്ഥമാക്കി.
അമേരിക്കയിലെ വിവിധ സ്റ്റേറ്റുകള്‍ക്ക് പുറമേ കാനഡ, കുവൈറ്റ്, ജര്‍മ്മനി എന്നിവിടങ്ങളില്‍ നിന്നായി നൂറോളം ടീമുകളാണ് ഇത്തവണ ട്രോഫിക്കായി മാറ്റുരച്ചത്. ഫാ. ബിന്‍സ് ചേത്തലില്‍ ഉദ്ഘാടനം ചെയ്ത ചടങ്ങുകള്‍ക്ക് ടൂര്‍ണമെന്‍റ് ജനറല്‍ കോര്‍ഡിനേറ്റര്‍ ഷിബു ജെയിംസ്, ഡാലസ് ചെയര്‍പേഴ്സണ്‍ ഷാജി പഴുക്കായില്‍, നാഷണല്‍ കോര്‍ഡിനേറ്റര്‍മാരായ മാത്യു ചെരുവില്‍ (ചെയര്‍ പേഴ്സണ്‍, ഡിട്രോയിറ്റ്), കുര്യന്‍ നെല്ലാമറ്റം (വൈസ് ചെയര്‍മാന്‍, ഷിക്കാഗോ), സാം ജെ. മാത്യു (കാനഡ), രാജന്‍ മാത്യു (ഡാലസ്), നിതിന്‍ ഈപ്പന്‍ (കണക്റ്റിക്കട്ട്), സാബു സ്കറിയ (ഫിലഡല്‍ഫിയ), ഐടി കോര്‍ഡിനേറ്റര്‍മാരായ ബിനോയ് ശങ്കരത്ത്(വാഷിംഗ്ടണ്‍ ഡി.സി), ആല്‍വിന്‍ ഷിക്കോര്‍ (ഷിക്കാഗോ)എന്നിവര്‍ നേതൃത്വം നല്‍കി.
ടൂര്‍ണമെന്‍റിന്‍റെ വിജയത്തിനായി പ്രവര്‍ത്തിച്ച കളിക്കാര്‍, ക്യാപ്റ്റന്‍മാര്‍, ഐടി കോര്‍ഡിനേറ്റര്‍മാര്‍, വോളന്‍റിയര്‍മാര്‍, സ്പോണ്‍സര്‍മാര്‍, സംഘാടകര്‍ എന്നിവര്‍ക്ക് ഭാരവാഹികള്‍ നന്ദി അറിയിച്ചു.
